今晚英超阿仙奴作客下游球隊般尼茅夫，近況凌厲嘅「兵工廠」近4仗全勝，球員狀態不斷冒升，而且近年對賽剋住般尼茅夫，一於熱捧客勝。
（Now 621及611周日凌晨零時30分直播）
阿仙奴喺國際賽期前4連勝，而且每場都贏2球或以上，表現極具說服力。夏維斯連續4場入波，狀態弗到震，佢同史達寧、加比爾捷西斯、湯馬士柏迪及賓韋特等主力都冇踢國際賽，布卡約沙卡亦提前歸隊，球員抖到夠更有利演出。
般茅進取防線穿窿
般尼茅夫近況麻麻，近4場聯賽3度輸波，而且領隊伊拉奧拿嘅進攻踢法相當冒險，面對擅於反擊嘅阿仙奴，隨時暴露大量空位被打爆。睇番兩隊對上5次正式比賽交鋒，阿仙奴全部贏晒，擺明格食格，客勝熱得有道理。