周二凌晨西甲賽事，近況大勇嘅馬略卡主場迎戰畢爾包。主隊今季喺教練阿拉沙迪嘅「務實足球」帶領下，表現令人眼前一亮，依家喺聯賽榜名列前茅，主場絕對有力擊退體能輸蝕，兼且聯賽接連失分嘅畢爾包，平手盤捧主隊最抵玩。（Now 632周二凌晨4時直播）

馬略卡今季防守相當硬淨，10場聯賽只係失咗8球，係西甲防線最好嘅球隊之一，佢哋嘅足球風格絕不華麗，但就非常實際，今季5場勝仗全部都係只贏1粒，包括近5場聯賽就有4次「煲魚生粥」，加上射手梅利基近期腳風唔錯，有力繼續引領馬略卡贏波。

畢爾包疲兵難發圍
另一方面，畢爾包依家成績雖然同馬略卡相同，不過近況就唔及主隊，近3場聯賽有2場失分，加上周中應付完歐霸盃賽事，球隊體能方面肯定會受到影響。

而且畢爾包對上一次作客馬略卡贏波，已經要數到12年前，今仗難免會被睇低一線，平手盤撐主隊好路。