聽朝世盃外南美區大戰，烏拉圭主場火併哥倫比亞。烏拉圭近期表現大跌Watt，特別係前線死晒火，老帥比爾沙似乎冇晒計，讓唔起夠韌唔易輸嘅哥倫比亞，讓球客勝咪錯過。

（周六早上8時開賽）
烏拉圭喺2022年世盃經歷分組賽出局嘅恥辱，決定搵比爾沙接手重建球隊，呢位老帥上任後明顯有起色，逐步清走蘇亞雷斯同卡雲尼等老臣，單計世盃外頭6輪獲4勝1和1負，確係重上正軌。但烏拉圭喺今夏美洲盃取得季軍後開始跌Watt，各項賽事近5場只得4和1負未贏過，單計4場世盃外更加全部食白果，之前表現出色嘅中鋒達雲紐尼斯又變番敗家仔，而早前退出國家隊嘅蘇亞雷斯，亦鬧爆比爾沙唔尊重球員，反映內部出現問題，難怪戰績插水喇！

戰績標青受讓超筍
相反，自從尼斯達羅倫素喺2022年7月執教後，哥倫比亞愈戰愈勇，除咗占士洛迪古斯弗番之外，仲有新一代嘅路易斯迪亞斯同祖漢杜蘭開始孭到飛，佢哋今夏美洲盃殺入決賽，加時僅輸畀阿根廷屈居亞軍，絕不失禮。哥倫比亞於各項賽事近33場，法定時間只係輸過1場，單計世盃外10戰錄5勝4和1負，未計今輪排次席，領先烏拉圭3分，論穩定性更勝一籌。加上近4次交手，哥倫比亞喺法定時間錄得1勝3和，包括早前美洲盃4強贏1比0，絕對唔怕烏拉圭，受讓咪錯過。