韓職轉彎入直路，今晚就上演兩場，其中浦項制鐵主場迎戰仁川聯。浦項制鐵戰績走下坡，踢法太過有前冇後係致命傷，今遇弱旅仁川聯，勢必以攻代守，2.5球入球大咪錯過。

（無綫myTV SUPER周五晚6時30分直播）
韓職常規賽依家剩番兩輪，季初表現強勢嘅浦項制鐵，明顯出現後勁不繼嘅迹象，各項賽事近13場，只得4勝1和8負，後防好似倒水咁瘋狂失波，合共失咗27粒，全部開3球或以上。好彩係佢哋上仗以2比1擊敗FC江原，總算止住3連敗跌勢。

更有運嘅係，浦項制鐵今場撞正「冇骨魚腩」仁川聯。仁川聯近9場僅2勝1和6負，依家敬陪末席，浦項制鐵難得遇弱，今場肯定以攻代守，2.5球入球大乃不二之選。

蔚山留力難讓大田市民
另一場同時間開波嘅韓職，大田市民主場硬撼蔚山HD。蔚山HD依家喺聯賽排緊榜首，領先次席金泉尚武2分，而且已鎖定前6爭標組行列，佢哋下周中亞冠精英盃要作客日職勁旅兼上屆亞軍橫濱水手，今場隨時有所保留。大田市民只係排第9，無緣殺入爭標組，不過佢哋狀態唔錯，近7場取得4勝3和未輸過，咁硬淨唔怕心不在焉嘅蔚山HD，讓球主客和有得受讓咁筍，必捧讓球主勝。